Эрхэм танд энэ өдрийн мэнд хүргэе!

2017 онд Монголын говь нутаг дах анхны салхин цахилгаан станц баригдсанаар Монгол Улс говийн салхийг ашиглан эрчим хүч үйлдвэрлэж, сэргээгдэх эрчим хүчнийхээ хүчин чадлыг 50 МВт-аар нэмэгдүүлсэн. Тус станцыг барьж байгуулсан “Клин Энержи Ази” компани нь шинэ бүтээмж, шинэ санааг эрчим хүчний суурь ойлголтод нэвтрүүлэн дараагийн түвшинд хүргэхээр салхины эрчмийг ашиглан цэвэр цахилгаан эрчим хүч үйлдвэрлэж, технологийн процессыг илүү дэвшилтэт байдлаар хүн бүрийн хэрэгцээнд хүргэхээр ажиллаж байна.

Цэций салхин цахилгаан станц жилд 218.4 сая кВт.ц цахилгаан үйлдвэрлэж, эрчим хүчний системд нийлүүлэх хүчин чадалтай. Өөрөөр хэлбэл, 113 мянган айлыг цахилгаан эрчим хүчээр хангах боломжтой гэсэн үг юм. 2017 оноос өнөөдрийг хүртэл Төвийн бүсийн эрчим хүчний системийн жилийн нийт хэрэглээний 2-3%-ийг “Цэций” станц хангаж байна. Мөн жил бүр 145 мянган тонн хүлэмжийн хийн ялгаруулалтыг бууруулж, 85 мянган тонн нүүрс, 1.0 сая тонн ус хэмнэж, байгаль орчинд төдий хэмжээний эерэг нөлөө үзүүлж байна. Цахилгаан эрчим хүч үйлдвэрлэж эхэлснээс хойш нийт 650 мянган тонн хүлэмжийн хийн ялгарлыг бууруулжээ. “Клин Энержи Ази” компани нийгмийн хариуцлагын хүрээнд орон нутгийн хөгжлийг дэмжихэд чиглэсэн, байгаль орчинд ээлтэй олон төсөл хөтөлбөрийг хэрэгжүүлдэг.

Түүнчлэн 2017 онд Өмнөговь аймгийн Цогтцэций сумын сум, Сийрст багийн удирдлагуудтай хамтран ажиллах санамж бичиг байгуулж, уг санамж бичгийн хүрээнд жил бүр амьжиргааны түвшнээс доогуур орлоготой өрхийн таван оюутан, малчдын өвөлжилтийн бэлтгэл ажилд зориулж өвс тэжээлийн туслалцаа үзүүлэх, орон нутгийн байгууллага болон хүүхэд залуучуудын хөгжлийг дэмжих зэрэг 10 орчим ажлын хүрээнд үйл ажиллагаанд дэмжлэг үзүүлэх ажлыг тогтмол хэрэгжүүлдэг. Цахилгаан эрчим хүч нь хоол хүнстэй адил бидний амьдралын зайлшгүй нэг хэсэг болсон бөгөөд энэхүү хэрэглээг байгальд ээлтэй технологиор хэрхэн хангах вэ гэдэг асуултын гол хариулт нь сэргээгдэх эрчим хүч юм. Түүнчлэн дэлхийн дулаарал, уур амьсгалын өөрчлөлтөд хүн төрөлхтний үзүүлж буй нөлөөг багасгахын төлөө манай станц бүхий л нөөц боломж, хүчин чармайлтаа дайчилж ажиллах болно.

Хүндэтгэсэн,

Гүйцэтгэх захирал Д.Ганхуяг